තොපි හැමටත් එයින් වුනා නේද සවුත්තු..!

//තොපි හැමටත් එයින් වුනා නේද සවුත්තු..!

තොපි හැමටත් එයින් වුනා නේද සවුත්තු..!

■   මහ වනයේ ලොකු ගෙඩි ඇති බෙලි ගසක් ඇතේ
ඒ ගස යට තල් පැළයක් පැළවෙලා ඇතේ

■   දවසක් සාවෙක් තල් ගස යට නිදියන්නේ
මහා පොළොව පෙරලේදැයි භයකින් උන්නේ

■   ඒ මොහොතේ බෙලි ගෙඩියක් ගිලිහී වැටුනා
තල් අත්තට හඬ දීගෙන එය බිම වැටුනා

■   ඒ සද්දෙට හාවා උඩ ගොස් බිම වැටුනා
පොළොව පෙරලෙනවා ම යි කියලා සිතුනා

■   පණත් එපා කියා හාවා හනික දුවන්නේ
ඇයි යාලුවා මොකද කියා හාවො අසන්නේ

■   පේන්නැද්ද මහ පෘථිවිය දැන් පෙරලෙනවෝ
පණට ආස අය හනිකට පැනල දුවපියෝ

■   එය අසලා සියලු සාවො පැනලා දිව්වා
ඇයි ද දුවන්නේ කියලා අන් අය ඇසුවා

■   මහා පොළොව පෙරලෙන බව හැමෝම කිව්වා
සියලු සතුන් එකතුව මහ භයකින් දිව්වා

■   බෝසත් සිංහයා දුවන සතුන්ව දැක්කා
ඇයි දුවන්නෙ කියලා එය විමසා සිටියා

■   මේකා අපට කිව්ව පොළොව පෙරලෙයි කියලා
එනිසයි අපි දුවන්නෙ පණ එපා ය කියලා

■   අනේ මෝඩයිනි තොපි ඔය කොහිද දුවන්නේ
තව දිව්වොත් තොපි මහ සයුරටයි වැටෙන්නේ

■   අසනා දෙය සිහි නුවණින් සිට අසපන්නේ
ඔය ගමනින් හැම දෙනා ම මැරිලා යන්නේ

■   සිංහය ඇවිත් ඒ ගැන විමසා සිටියා
අන්තිමේදී සොයාගත්ත ඒ හා පැටියා

■   හාවා භයවුනු තැනට යි සිංහය එන්නේ
බෙලි ගෙඩියක් වැටී තියෙන බව දැනගන්නේ

■   හනේ සතුනි ඇයි තොපිලා මෙතරම් මෝඩ
මොළේ නැද්ද මේ ගැන පොඩියක් විමසන්ඩ

■   වයසට ගොස් පැවිදි වූ අයෙක් ලක්දිව
වැරදි භාවනාවෙන් වැටුනානෙ අවුලක

■   භූතාවේශෙන් ඔහුගේ සිත අවුල් වුනා
බුදුන් උපන් බිම කණපිට හැරිලා පෙනුනා

■   ලංකාවෙලු හිමාල පර්වතේ තියෙන්නේ
මහමේරුව පිදුරුතලාගලලු තියෙන්නේ

■   චිංචි මානවික දෙව්දත් මෙහෙලු උපන්නේ
උදේනි රජු මාගන්දියා මෙහෙලු උපන්නේ

■   නාලාගිරි ඇතාට මෙහිදිලු රා පෙව්වේ
කොසොල් අජාසත් බිම්සර මෙහි රජ කෙරුවේ

■   සැවැත් නුවර දෙව්රම රිටිගලලු තියෙන්නේ
බරණැස ඉසිපතනේ වව්නියා තියෙන්නේ

■   රාජගිරිය අම්පාරෙලු පිහිටා ඇත්තේ
මහජනපද දහසය මේ රටේලු ඇත්තේ

■   රහත් ඵලය ලබලලු මේවා දැනගත්තේ
පටිසම්භිද නුවණලු ඔහු හට දැන් ඇත්තේ

■   මෝඩ රැලක් සාදු කියා එය පිළිගන්නේ
බුදුන් උපන්නේ ලක්දිව කියා නටන්නේ

■   භූතාවේශය හැමතැන පැතිරී යන්නේ
හැම දෙයක් ම කණපිටට යි උන්ට පෙනෙන්නේ

■   භූතාවේශෙන් හොඳ හැටි මගඵල දෙන්නේ
මෝඩ රැලත් සාදු කියා එය අරගන්නේ

■   එක පොදියට ආර්ය උපවාද කරන්නේ
උන් දෙස බලමින් හොඳ හැටි මරු හිනැහෙන්නේ

■   නාමරූප වැටහෙනකොට බඩ යනවාලු
සිත සමාධිගත වෙනකොට බඩ යනවාලු

■   මෝඩ ගෑනු ටික උඩඟුව නන් දොඩවන්නේ
දැහැන් ලබා ඇතැයි කියා නැටුම් නටන්නේ

■   මෝඩ පිරිමි රැලකුත් ඒ නැටුමට එන්නේ
මගඵල ලැබුවා කියමින් උඩු බුරලන්නේ

■   ඒ අයගේ මොළේ තියෙන්නේ කොයි පැත්තේ
දැන ගත්තොත් හොඳා නේද හිඳිනා පැත්තේ

■   නොපෙනෙන ලෝකෙන් ඔවුන්ව කළඹා ඇත්තේ
උඩඟුකමින් මං මුළාව වැනසී ඇත්තේ

■   මාර පිරිස මිනිස් වෙසින් මනුලොව එන්නේ
සිවුරු දරා ශ්‍රාවක වෙස් ගෙන හැසිරෙන්නේ

■   මෝඩ රැලක් අල්ලෙ තියා උන් නටවන්නේ
සුගතියෙ උපතත් එනිසා අහිමිව යන්නේ

■   සිංහයා මෙසේ ඒ ගැන සතුන්ට කිව්වා
විමසා නොබලා හාවා පැනලා දිව්වා

■   සතුනි දැක්ක නේ සිරිලක නව ඉතිහාසේ
බිම පෙරලේ කියලා හාවා දිව්වා සේ

■   මුළා වූ කෙනා කියනා බස පිළිගත්තූ
තොප හැමටත් එයින් වුනා නේද සවුත්තූ

■   මෙලෙසට ඒ සිංහ රජා පහදා දුන්නේ
හැමෝම බිම බලා ආපසු හැරිලා යන්නේ

By |2018-07-15T16:28:00+00:00July 15th, 2018|sadaham lipi|0 Comments

About the Author:

Leave A Comment